Esti blogue nun tién otru envís que'l de proporcionar testos, cartafueyos o llibros n'otres llingues tornaes al asturianu sobre temes que, normalmente, tan vetaos na nuesa llingua.
La edición d'un llibru ye caro, los llectores (y mas na llingua llariega) pocos, el sistema de sovenciones creáu polos españoles n'Asturies torga la posibilidá de falar temes como la llucha armada o'l socialismu y les editoriales qu'asumen esti papel, con gran esfuerzu pola so parte tamién sía dicho, suelen apostar por llibros nuevos mas que por tornes (asumiendo que si un llibru ya ta en castellanu ya puede lleese) colo que nun son quien a finar, pola mio parte al menos, coles ganes de mas llectura na llingua de nueso.
Siempre creí que la formación del individuu ye'l primer pasu haza la lliberación nacional y social, polo que la llectura ye la primer ferramienta, y la mas barata, pa formar a un militante. Los temes a tratar dirán, por ello, empobinaos a formase meyor en toles estayes que mos pueden resultar interesantes:
-L'internacionalismu, les lluches d'otros pueblos, l'imperialismu...
-La lliberación nacional, derechos colectivos...
-El socialismu, l'anarquía, el capitalismu...
-El feminismu, la sexualidá, la llibertá de xeneru...
-La defensa de la tierra, el consumu resposable, sostinibilidá...
-Derechos llinguisticos, la cultura, la diversidá, multiculturidá...
-Hestoria, sobremanera la hestoria escaecida.
-L'antifacismu, antiracismu, la llucha contra les inxusticies...
-La formación como militante, propaganda, disturbios, seguridá...
El formatu qu'usare ye'l PDF, por universal y prauticu, y ta preparáu pa ser imprimíu nel tamañu fanzine. El so unicu oxetivu ye'l de ser lleíu pola mayor cantidá de xente posible, la cultura ye llibre, polo que podeis facer l'usu que vos pete d'ellos, fotocopiandolos, dexandolos en centros sociales, enllazandolos nos vuesos blogues...
Porsupuestu, si tas interesáu en char una mano tornando testos tas convidaos a escribime a asturiesnation@gmail.com .
Pa finar pido comprensión colos mas que posibles erros llingüisticos que puedes atopar. Les mio llimitaciones na llingua, la falta de tiempu y de profesionalidá compensase, camiento col esfuerzu puestu en cada textu.
Puxa Asturies llibre!
Puxa la llucha y los que lluchen!
Puxa la llucha de los pueblos!
"...Y busco'l conocimientu, non pa sentime superior. Sinon, pa poder ser un Chifláu Consciente."
